Il-Hadd, 14 ta' Jannar 2007

Sgass f’Exchange Bureau f’Ghawdex
Misruqin aktar minn Lm7,000
Minn JOHN PISANI

• Hallelin li kellhom il-kumdità kollha biex iwettqu serqa, sabuha facli jisirqu aktar minn Lm7,000 fi flus Maltin u barranin.
Nhar is-Sibt ghal habta tad-9.30 a.m. sid il-fergha “Cremona Exchange Bureau” li tinsab fi Pjazza Savina fir-Rabat Ghawdex, mar biex jiftah il-post u nnota li l-katnazz tal-bieb ta’ barra kif ukoll il-bieb kienu sgassati. Ir-ragel, li ghandu 62 sena mir-Rabat stess, cempel lill-Pulizija fejn fuq il-post marru dawk mill-Ghassa ta’ Victoria mmexxija mis-Supretendent Mario Bonello u l-Ispettur Josric Mifsud. Minn stharrig li ghamlu l-Pulizija rrizulta li l-hallelin dahlu fil-post f’xi hin bejn nhar il-Hamis, 11 ta’ Jannar u l-bierah. Kif dahlu bdew iqalbu xi kxaxen sakemm sabu c-cavetta tas-safe minn fejn serqu aktar minn Lm7,000 fi flus Maltin u diversi flus barranin.
B’din is-serqa gie informat il-Magistrat Dr Tonio Micallef Trigona li ordna inkjesta u hatar diversi esperti tal-Qorti biex ihejju r-rapporti taghhom.